Зүүдний бус сэтгэлийн гүнээс
Зүрх цагаан хараацай нисээрэй
Сартай хээрээрээ алхуулж яваа
Сайхан аавын минь дөрөөг шүргээрэй
Цовоо хараацай дөрөө шүргэхэд
Цочоод аав минь юу гэж хэлэхийг сонсоорой
Зүүдний бус сэтгэлийн гүнээс
Зүрх цагаан хараацай нисээрэй
Намайг амилуулсан өндгөн цагаан гэрийн
Нар уудалсан тооноор сүүдрээ дусааж нисээрэй
Нас тогтсон ээж минь хүүгээ санаж уулга алдах бий
Надад л хувьтай тэр үгийг газар унагалгүй зууж ирээрэй
Зүүдний бус сэтгэлийн гүнээс
Зүрх цагаан хараацай нисээрэй
Наран унаж салхин тогтсон
Намуухан шар тал дээр буугаарай
Мөрөөдлийн бус талын шувуухай яаж жиргэдгийг
Мөнөөхөн хараацай шүлгийн хэлээр шивнэж хэлээрэй
Зүүдний бус сэтгэлийн гүнээс
Зүрх цагаан хараацай нисээрэй
Бүрэнхийн харз шиг тэлмэн харцтай
Бүжин охины шанхаар наадан шунгаарай
Ядмаг бүхнээс цойлж гарсан зүрхний хараацай
Янагийн дуу дундаас миний л үгийг түүнд хүргээрэй
Зүүдний бус сэтгэлийн гүнээс
Зүрх цагаан хараацай нисээрэй
댓글 없음:
댓글 쓰기